هاضت هواجــيس الفـكـر والصّـــدر بــاح *** والقلب عـن ســـرّه تـزايد نضيحه
واقفت نـجـوم الليل مــعْ فـجـــر الاصباح *** وطرالي اكــتب للنشــامـا نـصيحه
مـثـايــل ٍ مــثـل العـطـر والــعــطـر فـاح *** نـظـمـتها لأهــل الوجـيــه الفليحه
حذراك من رجل ٍ عـلـى الــســـدّ فـضـّاح *** اللي لـيـا قـفّـيـــت ســـدّك يـبيحه
واحذر من اللي ما تـــبـع درب الاصـــلاح *** كــسّابــة الـمتردّيــه والـنـطـيـحه
بـعــض الـعرب يــزيد قـلـبـك بالاجـــراح *** الله يــــبـعـد عـن ديارك نـزيـحـه
حـتّـيـش لــو جـالـك وحـتّـيــش لــــو راح *** ماهــوب يـنفع فالليال الـشـحيحه
اقــــولـــهـــا صــادق ولانــــي بـمـزّاح *** يا كثرهم أهـــل الوجـيــه الوكيحه
احرص على اللي لشوفه الـنّـفس تــرتاح *** اللي يداوي كلّ نـفــــس ٍ جريـحه
واحرص على اللي دايم الــدّوم نـــصـّاح *** اللي دروبــه كــلّـبـوهــا صريحه
واحرص على اللي جلسته خـيـر واربـاح *** راع العلوم الطيـّــبـــه والـمـلـيحه
واحرص على اللي يسعدك وقت الاتراح *** ويعجبك لاضاقــت عليك الفسيحه
شـــهـــم ٍ كـــريــم ٍ للـمــواجـيـب نـطّاح *** حـرٍّ عـزيــز ٍ مــا مشى بالفضيحه
شــيــخ ٍ ســنـافـي كاسب ٍ كل الامداح *** ريــف ٍ لــربعــه والرجال الطريحه
لا ثــارت الــهــيــجـا مـــعَ شلف ورمـاح *** يــنـحـر حــريبه مثل نحر الذبيحه
ســعــد الـرفـيــق وللــعــدو سمٍّ اذحاح *** امــجـنّــب ٍ كـــل الصفات القبيحه
هــذا الـــذي يــبــقــى لنا درع ووشاح *** والا الرّدي يــا لـيت يبنى ضريحه
درب الـمــعــزه يــعـرفــه ربــع ٍ اصحاح *** اللي تــــروم الــمرجله والمديحه
والــمــرجــلــه يـبــغى لـها صبر وكْفاح *** شـــدّ الحزام وخلّ نفسك لحيحه
والـــزم كـتـاب الله عـلــى طول يا صاح *** تـــرى بريق الشر يجـذب لـميحه
واحــفـظ حـقــوق الجار .. خلّك له سلاح *** قـالــه رسول الله بحكمه فصيحه
والصــمـت حـكــمــه والـصبر خير مفتاح *** والـعـــدل ميزان العقول الرجيحه
هـــذي مــثـايـــل صغـتـها وسط الالواح *** نــظـمـتها لأهل القلوب الصِّحيحه
والخــتــم صــلــوا عـــدّ مــا بـــارق ٍ لاح *** على النبي واعداد فيض القريحه
السبت نوفمبر 10, 2007 12:49 am
